Дојде време и за споро готвење :)

    Во периодот на првите карантини минатата година многу луѓе експериментираа со леб, кифли, паста и слично. Да не се лажеме – аромата на топол леб е неодолива!

Треба да  кажам дека кој не работел од дома со три деца и домашен миленик, нема видено ништо. Целата ситуација е уште попредизвикувачка од кога ќе се вклучат камери и цело одделение ти е практично во соба, а работата ти е на телефон и на мејл, наставата е на смени онлјан и мачката бара маж. 😵

И така, со повторното зголемување на бројките на позитивни Covid-19 тестови, повторно треба да дремеме дома ( разбирај, да се пазиме и да внимаваме во убаво сончево време, кога децата, а и возрасните треба да бидат надвор заради многу други здравствени придобивки) .

Затоа  по многу размислување дали ми треба или не такво чудо како slow cooker, решив дека идам и го купувам.

Вчера, нарамила торба за пазарење САМО за едно пакување пилешки стек и кило кромид(😁аха, друг пат ) со мојата пријателка Кате тргнавме во дождот ( кога инаку ) до продавница. Натоваривме се прилично добро и на каса го купив уредот во прашање – Adler .  Одиме си ние со кутијата, довдот си врне ама не кој му е гајле!  Важното е дека од денес јадењето ќе се готви само. 😎😂

Распакувањето не помина без набљудувач.

Самиот уред е тежок заради керамичкиот сад. Собира 6,5 литри. Сеуште немам осет колку е тоа во споредба со нормалните тенџериња во кои готвам и тоа се одрази на количината на сол која ставив.

Рецептот, кој го избрав за тест е овој:

1кг кромид, исецкан на полумесеци

350гр печурки

1 кг пилешки стек исечен на 2см дебели ленти

100мл вода ( требаше да биде да е 70мл пиво со 30мл вода)

мајчина душица, хималајска сол, бибер

Наредив се во керамичкиот сад во редот кромид – печурки – месо – зачини, го наместив тајмерот, подесив времето за готвење на 5 часа со идејата да биде готово наредното утро в 7.30, за да не се занимавам цел ден со тоа во недела.

Долго се борив со мирисот на кромид, но не издржав и станав во 7 во недела, отворив пошироко прозорот и се зафатив со доспремање на ручекот. Месото беше сварено одлично, сосот беше токму колку треба. Убавина! Претпоставувам дека може и со батаци, но не ми се допаѓа пилешката кожа и жилите од пилето во манџата. Готовото јадење може да се запече дополнително во рерна во истиот керамички сад.

*Белешки – кромидот треба да е многу тенко исецкан и зачините треба да бидат повеќе. Керамичкиот сад беше на пола полн. Претпоставувам дека една лажица сол ќе беше перфектно.

Едниот гарнир е домашно пире од компири, другиот – тазе испечен леб со квасец за мацкање во сосот. Сигурно може да се измисли и нешто покреативно, но кога човек е поспан, не му иде креативата. 😊