Овчарска манџа или добродошли назад

Спомените се уште тазе и морам да споделам некои од нив пред рецептот.

Местото каде главно ни поминуваше претпладнето беше бар “Централ“  во Асеновград, Бугарија. Веќе повеќе од 10 години служат највкусната риба,слична на гирици, измеѓу еден куп салати, скара и предјадења, а од пред некое време нудат прекрасни десерти, смуди и други вкусни работи. Во средина на сликата е Семифредо-мек чоколаден мус со сурови ф`стаци и суво грозје, а се сервира со кокосов сладолед.

Се разбира, ја имаме и нашата комшика, Галја, од која ни е исклучителното слатко од шумски јаготки кое немаше како да не послужиме со палачинки за кои искористивме еден куп јајца од слободни кокошки од мојот вујко Васко – вкусни, вкусни… само не сум јас мајстор за крем-карамел како вујна ми Петја. Немаше како да поминеме и без торта од брат ми за вториот роденденот на најмалиот син. 

И така, вратени во скопската реалност мораме да се вратиме и кон кујнските обврски.

Еве една сосема обична  манџа, која пред доста години за прв пат ја направи дечкото на мојата цимерка од студентскиот дом. 

Овчарска манџа

зелена пиперка, црвена пиперка

1-2 домати

мало парче корен од целер

малку свеж магдоноз

хималајска сол на вкус, може и сосема малку бибер

ориз

Се` е на око, продуктите се сецкат на ситни парчиња, доматите на покрупни.Убаво е оризот да се измие и се` оди во тава со доволно вода. Се пече на средна температура, додека оризот омекне и ја упие целата вода. Тоа е тоа. Добар апетит!
Полесно од тоа нема на каде.
Вкупно за една голема тава (6-8 порции) – околу 100 денари.

Следниот пат ќе ви раскажам за еден многу интересен семинар кој успеав да посетам додека бевме во Бугарија. 😉